ᑖᓐᓇ ᐅᑭᐅᖅᑕᖅᑐᒥᑦ ᓴᓇᐅᒐᓕᐅᖅᑎᓄᑦ ᑲᑎᒪᓂᕐᔪᐊᖑᔪᖅ ᑲᑎᑎᑦᓯᒪᕗᖅ ᑭᒡᒐᖅᑐᐃᔨᐅᔪᓂᒃ ᒋᔭᖏᓐᓂᒃ ᐅᑭᐅᖅᑕᖅᑐᒥᒃ ᓄᓇᓕᒋᔭᐅᔪᓂᑦ ᐊᒻᒪᓗ ᓄᓇᖃᖅᑳᖅᓯᒪᔪᓂᒃ ᓯᓚᕐᔪᐊ ᑲᓇᖕᓇᖓᓂᕐᒥᐅᓂᑦ. ᑖᓐᓇ ᑲᑎᒪᓂᕐᔪᐊᖅ ᓴᙱᓕᖅᑎᑦᑎᓯᒪᕗᖅ ᓴᓇᐅᒐᓕᐊᖑᔪᓂᒃ ᐊᒻᒪᓗ ᐃᓕᖅᑯᓯᑐᖃᕆᔭᐅᔪᓂᒃ ᐅᑭᐅᖅᑕᖅᑐᒥᑦ ᐊᒻᒪ ᐱᕙᓪᓕᐊᑎᑦᑎᓯᒪᓪᓗᓂ ᐅᑭᐅᖅᑕᖅᑐᒥᐅᓂᑦ ᑯᐊᐳᕇᓴᖏᓐᓂᒃ ᐱᓕᕆᖃᑎᒌᑦᑎᐊᕐᓂᕐᒥᒃ ᓴᓇᐅᒐᓕᐅᖅᑎᓂᒃ ᐊᒻᒪᓗ ᐃᓕᖅᑯᓯᑐᖃᓕᕆᓂᐅᔪᓂᒃ.
ᓯᕗᓪᓕᖅᐹᖑᓚᐅᖅᓯᒪᔪᖅ ᐅᑭᐅᖅᑕᖅᑐᒥᑦ ᓴᓇᐅᒐᓕᐅᕆᓂᕐᒧᑦ ᑲᑎᒪᓂᕐᔪᐊᖅ ᓅᕙᐃᒥᑦ ᑲᑎᒪᓂᐅᓚᐅᖅᓯᒪᔪᖅ, ᐱᒋᐊᖅᑎᑦᑎᔾᔪᑕᐅᓚᐅᖅᑐᖅ ᑖᒃᑯᓇᖓᑦ ᐅᑭᐅᖅᑕᖅᑐᒥᑦ ᓴᓇᐅᒐᓕᐅᖅᑎᓄᑦ ᖁᕕᐊᓲᑕᐅᑎᓪᓗᒍ ᐊᒻᒪᓗ ᑐᖓᓱᒃᑎᑦᑎᔾᔪᑕᐅᑎᓪᓗᒍ 2017-ᖑᑎᓪᓗᒍ ᑖᒃᑯᓇᖓᑦ ᓅᕙᐃᒥᐅᑦ ᒥᓂᔅᑕᖏᓐᓂ ᐃᓕᖅᑯᓯᓕᕆᔨᐅᔪᓄᑦ ᐊᒻᒪᓗ ᓴᓇᐅᒐᓕᐅᖅᑎᓄᑦ
ᑲᑎᒪᔨᖏᓐᓂ ᓅᕙᐃᒥᑦ.
ᑐᒡᓕᐊ ᑲᑎᒪᓂᕐᔪᐊᖑᓚᐅᖅᑐᖅ ᕖᓐᓛᓐᒥᑦ, ᑐᖓᓱᒃᑎᑦᑎᓪᓗᑎᒡᓗ `2019-ᖑᑎᓪᓗ ᕖᓐᓛᓐᒥᐅᓂᑦ ᒥᓂᔅᑕᖏᓐᓂᒃ ᐃᓕᓐᓂᐊᖅᑐᓕᕆᒃᑯᖏᓐᓂᒃ ᐊᒻᒪᓗ ᐃᓕᖅᑯᓯᓕᕆᔨᒃᑯᖏᓐᓂᒃ, ᓴᓇᐅᒐᓕᕆᓂᕐᒧᑦ ᑐᒃᑕᕐᕕᐅᔪᒥᑦ ᕖᓐᓛᓐᒥᑦ (ᑕᐃᑭ), ᐊᒻᒪᓗ ᓯᓚᑦᑐᖅᓴᕐᕕᒡᔪᐊᖓᓂᑦ ᓛᑉᓛᓐᒥᑦ.
ᑲᓇᑕᒥᑦ ᑲᑎᒪᔨᕐᔪᐊᖏᑦ ᑕᒪᒃᑯᓄᖓ ᓴᓇᐅᒐᓕᕆᓂᐅᔪᓂᒃ ᐊᒻᒪᓗ ᔫᑳᓐᒥᑦ ᒐᕙᒪᖓᓂᓐᓂᑦ ᑐᖓᓱᒃᑎᑦᑎᖃᑕᐅᓂᐊᖅᑐᑦ ᐱᖓᔪᒋᓕᖅᑕᖓᓂᑦ ᐅᑭᐅᖅᑕᖅᑐᒥᑦ ᓴᓇᐅᒐᓕᕆᓂᕐᒧᑦ ᑲᑎᒪᓂᕐᔪᐊᕐᒥᑦ ᕗᐊᐃᖅᕼᐅᕐᔅᒥᑦ, ᔫᑲᓐᓂᒥᑦ.
2022−ᖑᓕᖅᐸᑦ ᐅᑭᐅᖅᑕᖅᑐᒥᑦ ᓴᓇᐅᒐᓕᕆᓂᕐᒧᑦ ᑲᑎᒪᓂᕐᔪᐊᖅ ᑲᑎᑎᑦᑎᓂᐊᖅᐳᑦ ᑲᑎᒪᖃᑕᐅᓂᐊᖅᑐᓂᒃ ᐅᑭᐅᖅᑕᖅᑐᒥᐅᓕᒫᓂᒃ ᐱᓕᕆᐊᒥᓂᒃ ᐱᔾᔪᑎᖃᕐᓗᑎᒃ ᖃᓄᖅ ᓴᓇᐅᒐᓕᐅᖃᑦᑕᓕᕐᓂᕐᒥᓂᒃ ᐅᖃᐅᓯᖃᕐᓗᑎᒃ ᐊᒻᒪᓗ ᓄᓇᖃᖅᑳᖅᓯᒪᔪᑦ ᓂᐱᖏᓐᓂᒃ ᑐᓵᑎᑦᑎᓗᑎᒃ. ᖃᕆᓴᐅᔭᑎᒍᑦ ᑕᑯᒃᓴᐅᑎᑦᑎᓂᐊᖅᑐᑦ ᑭᒃᑯᓕᒫᓂᒃ ᐃᓚᐅᑎᑦᑎᓗᑎᒡᓗ ᐅᖃᓪᓚᖃᑎᒌᖕᓂᕐᒥᒃ ᐊᒻᒪᓗ ᑕᐅᑐᖃᑦᑕᐅᑎᓗᑎᒃ ᐅᖃᓪᓚᖃᑎᒌᒡᓗᑎᒃ.
ᐱᔾᔪᑕᐅᔪᑦ 2022−ᒥᑦ ᑲᑎᒪᓂᕐᔪᐊᕐᒥᑦ
ᑖᓐᓇ 2022−ᒥᑦ ᐅᑭᐅᖅᑕᖅᑐᒥᑦ ᓴᓇᐅᒐᓕᕆᓂᕐᒧᑦ ᑲᑎᒪᓂᕐᔪᐊᒍᓂᐊᖅᑐᖅ ᐱᔾᔪᑎᖃᕐᓂᐊᖅᐳᖅ ᑲᑎᓯᒪᓂᖃᕐᓂᕐᒧᑦ ᓄᓇᒥᑦ, ᖃᐅᔨᓇᓱᒡᓗᑎᒃ ᐅᑭᐅᖅᑕᖅᒥᐅᑦ ᓴᓇᐅᒐᓕᐊᕆᕙᒃᑕᖏᓐᓂᒃ ᐊᒻᒪᓗ ᐃᓕᖅᑯᓯᑐᖃᖏᓐᓂᒃ ᐱᔾᔪᑎᖃᕐᓗᑎᒃ:
- ᓄᓇ: ᐅᖃᐅᓰᖅ, ᓄᓇᓖᑦ, ᐃᑦᑕᕐᓂᓴᓕᕆᓂᖅ, ᐊᒻᒪᓗ ᑭᓇᐅᒪᖔᖏᓐᓂᒃ
- ᓄᓇᖃᖅᑳᖅᓯᒪᔪᑦ ᓴᙱᓂᕆᔭᖏᓐᓂᒃ: ᐃᒻᒥᓂᒃ ᐱᔪᒪᑦᑎᐊᕐᓂᖏᓐᓂᒃ, ᓄᓇᖃᖅᑳᖅᓯᒪᓂᕆᔭᖏᓐᓂᒃ ᐊᒻᒪᓗ ᐃᒻᒥᓂᒃ ᓄᓇᑖᕋᓱᖕᓂᖏᓐᓂᒃ
- ᓯᓚᐅᑉ ᖃᓄᐃᓐᓂᖓ: ᐊᕙᑎᒥᒃ ᑲᔪᓯᑎᑦᑎᔪᓐᓇᑦᑎᐊᕐᓂᕐᒥᒃ, ᐊᒃᓱᕈᕐᓇᕐᓂᖅ ᐊᒻᒪ ᖃᓄᐃᓕᐅᕈᓐᓇᕐᓂᖅ
- ᓴᖅᑭᑎᑦᑎᓂᖅ: ᓴᓇᔩᑦ, ᓴᓇᓂᖅ, ᐊᒻᒪᓗ ᓴᓇᐅᒐᓕᐅᕐᓂᕐᒥᑦ ᓴᖅᑭᑎᕆᓂᖅ
- ᑭᒡᒐᖅᑐᐃᓂᖅ: ᐱᓕᕆᕝᕖᑦ ᐊᒻᒪᓗ ᐃᓕᖅᑯᓯᑦᑎᐊᕙᐃᑦ, ᐱᓕᕆᐊᖑᓪᓚᕆᒍᒪᔪᑦ, ᐃᓕᓐᓂᐊᕐᓂᓕᕆᓂᖅ, ᐊᑐᐊᒐᓕᕆᓂᖅ, ᒪᓕᒋᐊᓖᑦ, ᐅᑎᖅᑎᑕᐅᓂᖏᓐᓂᑦ
- ᓯᓚᕐᔪᐊᑉ ᓂᒋᖅᐸᓯᐊᓂᕐᒥᐅᑦ ᑲᑐᔾᔨᖃᑎᒌᖕᓂᖏᑦ: ᐱᓕᕆᖃᑎᒌᖕᓂᖅ ᐊᒻᒪᓗ ᐱᓕᕆᖃᑎᒌᑦᑎᐊᕐᓂᖅ
- ᖃᕆᓴᐅᔭᓕᕆᓂᖅ: ᖃᕆᓴᐅᔭᑎᒍᑦ ᓴᓇᐅᒐᓕᐊᑦ, ᑎᑎᕋᖅᑕᐅᓯᒪᔪᑦ ᖃᐅᔨᓴᖅᑕᐅᓂᒃᑯᑦ, ᐃᓯᕈᓐᓇᕐᓂᖅ, ᓄᑖᑦ ᑐᓴᒐᒃᓴᓕᐊᑦ
- ᐱᓇᓱᐊᖅᑎᐅᔪᑦ ᖃᐅᔨᑎᑦᑎᓇᓱᒃᖢᑎᒃ ᒪᓕᒐᓕᕆᔨᒃᑯᓐᓄᑦ: ᐃᖏᕐᕋᓃᑦ ᐊᒻᒪᓗ ᐃᓅᓯᕐᒧᑦ ᐊᓯᔾᔨᕈᑏᑦ
- ᓯᕗᓂᒃᓴᐅᓂᐊᖅᑐᑦ: ᓄᑖᑦ ᓇᒧᖓᐅᓂᐅᔪᑦ, ᒪᒃᑯᒃᑐᑦ ᓂᐱᖏᑦ, ᑕᐅᑐᖑᐊᖅᑕᖏᓪᓗ
“
“ᐃᓱᒪᒋᔭᐅᓯᒪᔪᖅ ᓴᖅᑭᑦᑎᔪᒪᓪᓗᑎᒃ ᐅᑭᐅᖅᑕᖅᑐᒥ ᑲᑎᒪᕐᔪᐊᕐᓂᕐᒥᒃ ᓴᓇᙳᐊᕐᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᐱᒋᐊᓚᐅᖅᓯᒪᔪᖅ 2015-ᒥ. ᑕᐃᔅᓱᒪᓂ, ᒐᕙᒪᓕᕆᓂᕐᒧᑦ ᐅᖃᐅᓯᐅᖃᑦᑕᓚᐅᖅᓯᒪᔪᖅ ᓯᕗᓂᒃᓴᑦᑎᓐᓂ ᐅᑭᐅᖅᑕᖅᑐᒥ ᐱᕙᓪᓕᐊᓂᐅᓂᐊᖅᑐᒥᒃ ᖃᓪᓗᓈᑦ ᓄᓇᖓᓐᓂᙶᖅᖢᑎᒃ ᐊᒻᒪ ᐅᑭᐅᖅᑕᖅᑐᒥ ᐃᓱᒪᒋᔭᐅᓗᐊᓚᐅᙱᖦᖢᑎᒃ. ᑐᑭᒧᐊᒃᑎᑦᑎᔨᐅᓪᓗᖓ ᕙᔅᐱᓐ I Nord-Norge-—ᐊᖏᓛᖑᔪᖅ ᓴᓇᐅᒐᕐᓄᑦ ᖁᕕᐊᓲᑎᖃᕐᓂᖅ ᐅᑭᐅᖅᑕᖅᑐᒥ−ᓴᖅᑭᑕᐅᓚᐅᖅᑐᖓ ᖃᓄᖅ ᓄᓇᕐᔪᐊᕐᒥ ᐅᓂᒃᑳᑦ ᐊᒻᒪ ᐃᓕᓴᕆᔭᐅᓯᒪᔪᑦ ᑎᑎᖅᑲᑦ ᐅᑭᐅᖅᑕᖅᑐᒥ ᑭᒡᓕᖃᖅᑎᑕᐅᓚᐅᕐᒪᑕ ᓄᓇᒥᙶᖅᑐᓂᒃ ᐊᐅᓚᑦᑎᓂᕐᒧᑦ ᐊᒻᒪ ᓄᓇᕐᔪᐊᕐᒥ ᐊᕙᑎᓕᕆᓂᕐᒨᖓᔪᓄᑦ, ᐊᒻᒪ ᐱᑕᖃᑦᑎᐊᙱᖦᖢᓂ ᐃᓱᒪᒋᔭᐅᔪᓂᒃ ᐃᓄᖕᓄᑦ ᖁᑦᑎᒃᑐᒥ ᐅᑭᐅᖅᑕᖅᑐᒥ. ᓴᓇᐅᒐᓕᕆᓂᖅ ᐊᒻᒪ ᐃᓕᖅᑯᓯᓕᕆᓂᖅ ᐅᖃᐅᓯᐅᓚᐅᙱᓚᓪᓘᓐᓃᑦ ᒐᕙᒪᓕᕆᓂᒃᑯᑦ. ᓱᓕ, ᐅᑭᐅᖅᑕᖅᑐᒥ ᑕᐅᑐᒃᑕᒃᑯᑦ, ᐃᓕᖅᑯᓯᕗᑦ ᐱᒻᒪᕆᐅᓚᐅᖅᐳᖅ ᐊᒻᒪ ᓱᓕ ᐱᒻᒪᕆᐅᓪᓗᓂ ᐃᖏᕐᕋᔾᔪᑕᐅᓪᓗᓂ ᑲᔪᓰᓐᓇᕈᓐᓇᖅᑐᓂᒃ ᐱᕈᖅᐸᓪᓕᐊᔪᓄᑦ ᐊᒻᒪ ᐱᕙᓪᓕᐊᑎᑕᐅᔪᓄᑦ ᐅᑭᐅᖅᑕᖅᑐᒥ.
ᐃᓕᖅᑯᓯᓕᕆᓂᖅ ᐱᒻᒪᕆᐅᑐᐃᓐᓇᙱᓚᖅ, ᐱᒻᒪᕆᐅᓂᖅᓴᐅᓪᓗᓂ ᑭᒡᒐᖅᑐᐃᖕᒪᑦ ᓴᖅᑭᔮᖅᑎᑦᑎᓪᓗᓂᓗ ᐃᓄᐃᑦ ᐱᓪᓚᑦᑖᖏᓐᓂᑦ ᐃᓅᓯᖏᓐᓂᒡᓗ ᐅᑭᐅᖅᑕᖅᑐᒥᑦ. ᖁᕕᐊᓱᖃᑎᒌᒃᑎᓪᓗᑕ ᐋᖅᑭᒃᓱᐃᔨᐅᓪᓗᑕ ᐊᒻᒪ ᓴᓇᙳᐊᖅᑎᒻᒪᕆᐅᓪᓗᑕ, ᑲᒪᒋᔭᒃᓴᖃᓕᓚᐅᖅᐳᒍᑦ ᐊᑐᕐᓗᑕ ᐃᑲᔫᑎᒃᓴᑦᑎᓐᓂᒃ ᓴᖅᑭᑦᑎᓇᓱᒡᓗᑕ ᑲᓇᑕᐅᑉ ᓯᓚᑖᓂᙶᖅᑐᑦ ᑐᙵᕕᖏᓐᓂᒃ ᓴᖅᑭᑦᑎᔪᓐᓇᖅᑐᒥᒃ ᑕᐅᑐᖅᑰᖅᑕᐅᔪᓂᒃ ᓴᓇᐅᒐᕐᓂᒃ ᐊᒻᒪ ᐃᓕᖅᑯᓯᕐᓂᒃ ᒐᕙᒪᓕᕆᔾᔪᓯᕐᒧᑦ ᐅᑭᐅᖅᑕᖅᑐᒥ ᐱᕙᓪᓕᐊᑎᑕᐅᔪᓄᑦ. ᓴᖅᑭᑦᑎᓚᐅᙱᓐᓂᑦᑎᓐᓂᑦ ᐅᑭᐅᖅᑕᖅᑐᒥᑦ ᓴᓇᐅᒐᓕᕆᓂᖕᒧᑦ ᑲᑎᒪᓂᖕᒥᑦ 2017−ᒥᑦ, ᐅᑭᐅᖅᑕᖅᑐᓕᐊᓚᐅᖅᑐᒍᑦ ᑕᖅᑭᓄᑦ 18−ᓄᑦ ᑲᑎᖃᑎᖃᕆᐊᖅᑐᖅᖢᑕ ᓴᓇᐅᒐᓕᐅᖅᑎᓂᑦ, ᓴᓇᐅᒐᓕᕆᓂᖕᓄᑦ ᑲᑐᔾᔨᖃᑎᒌᓂᑦ, ᐃᓕᖅᑯᓯᓕᕆᕕᖕᓂᑦ, ᒥᓂᔅᑕᓂᑦ ᐱᓲᑎᓂᒡᓗ. ᐳᕆᒃ ᑉᕆᒃ-ᒧᑦ ᐊᐅᓚᑦᑎᓚᐅᖅᑐᒍᑦ ᐊᔾᔨᒌᓂᒃ ᑐᑭᓯᐅᒪᓂᕐᒥᒃ ᐱᔭᕆᐊᖃᕐᓂᕐᒧᑦ ᓄᓇᕐᔪᐊᕐᒥ ᑲᑎᒪᕕᒃᔪᐊᕐᓂᕐᒥᒃ ᐊᒻᒪᓗ, ᐊᑕᐅᑦᑎᒃᑯᑦ ᓄᐊᐅᐃᔾᔭᓐ ᒥᓂᔅᑕᐅᖃᑎᒌᑦ ᐃᓕᖅᑯᓯᓕᕆᓂᕐᒧᑦ ᐅᑭᐅᖅᑕᖅᑐᒥ ᓴᓇᐅᒃᑲᓄᑦ ᖁᕕᐊᓲᑎᖃᕐᓂᕐᒧᑦ, ᐊᐅᓚᑦᑎᓪᓗᑕ ᐃᑲᔪᖅᑐᐃᓂᕐᒥᒃ ᐊᒻᒪᓗ ᐱᔪᒪᓂᖃᕐᓂᕐᒥᒃ ᐅᑭᐅᖅᑕᖅᑐᓕᒫᒥ.
ᑲᓇᑕ ᐱᒋᐊᕐᓂᖃᓚᐅᖅᑐᖅ ᑲᑐᔾᔨᖃᑎᒌᓐᓂᕐᒥᑦ, ᐃᑲᔪᖅᑕᐅᑦᓱᑎᓪᓗ ᐃᑲᔪᖅᑐᖅᑕᐅᓂᕐᒥᑦ ᑲᓇᑕᒥ ᐱᓕᕆᐊᑦᓴᓄᑦ ᓄᐊᕙᐃᒥ ᑲᓇᑕᒥᓗ ᑲᑎᒪᔩᑦ ᓴᓇᐅᒐᕐᓄᑦ, ᓯᕗᓪᓕᖅ ᐅᑭᐅᖅᑕᖅᑐᒥᑦ ᓴᓇᙳᐊᕐᓂᕐᒧᑦ ᑲᑎᒪᓂᖅ ᐱᒋᐊᓪᓚᕆᓚᐅᖅᑐᖅ ᔫᓂ 2017-ᒥ, ᑭᒡᒐᖅᑐᐃᔨᖃᖅᓱᑎᒃ ᐃᓘᓐᓇᖏᓐᓂᑦ 8-ᓂ ᐅᑭᐅᖅᑕᖅᑐᒥᑦ, ᐃᓚᒋᔭᐅᑦᓱᑎᒃ ᓄᐊᑎᒃ ᑲᑎᒪᔨᖏᑦ ᒥᓂᔅᑕᐃᑦ, ᐅᑭᐅᖅᑕᖅᑐᒥ ᑲᑎᒪᔩᑦ ᐊᓪᓚᕝᕕᖓᑦ, ᑕᕆᐅᑉ ᐊᑭᐊᓂᑦ ᑲᑐᔾᔨᖃᑎᒌᑦ, ᐊᒻᒪ ᐊᔾᔨᒌᙱᑦᑐᓂᒃ ᓴᓇᙳᐊᕐᕕᖕᓂᒃ, ᓴᓇᙳᐊᕐᓂᕐᒧᑦ ᑲᑐᔾᔨᖃᑎᒌᓂᒃ ᐊᒻᒪ ᓴᓇᙳᐊᖅᑎᓂᒃ.”
– Maria Utsi
ᑲᑎᒪᕐᔪᐊᕐᓂᖅ ᐊᒻᒪ 2022 ᓄᓇᕐᔪᐊᕐᒥ ᑐᓴᐅᒪᔪᓕᕆᔾᔪᑎᑦ
ᐱᔾᔪᑎᓕᒃ ᖃᕆᓴᐅᔭᑎᒍᑦ ᐱᓕᕆᐊᖑᔪᓂᒃ
ᐱᕙᓪᓕᐊᑎᓪᓗᒋᑦ ᑲᑎᒪᓂᕐᔪᐊᖑᓂᐊᖅᑐᒥᒃ ᑕᐅᑐᖃᑦᑕᐅᑎᓗᑎᒃ, ᖃᕆᓴᐅᔭᑎᖑᓪᓗ ᐃᓚᐅᓂᐊᖅᑐᓂᒃ ᐱᖁᔭᐅᒻᒪᕆᒃᐳᑦ ᖃᐅᔨᓇᓱᒃᓗᑎᒃ ᐃᓅᖃᑎᒌᒡᓗᑎᒡᓗ ᐱᔾᔪᑎᖃᖅᑎᓪᓗᒋᑦ ᐅᑭᐅᖅᑕᖅᑐᒥᑦ ᓴᓇᐅᒐᓕᕆᓂᕐᒥᑦ ᑲᑎᒪᕐᔪᐊᖅᑎᓪᓗᒋᑦ ᖃᕆᓴᐅᔭᑎᒍᑦ. ᐃᑭᐊᖅᑭᕕᒃᑎᒍᑦ ᑕᑯᒃᓴᐅᑎᑦᑎᕗᑦ ᓴᓇᐅᒐᓕᐊᖑᓯᒪᔪᓂᒃ ᐊᒻᒪᓗ ᐃᓕᖅᑯᓯᑐᖃᕆᔭᐅᔪᓂᒃ ᐅᑭᐅᖅᑕᖅᑐᓕᒫᒥᑦ, ᑐᓴᒐᒃᓴᓕᕆᔨᒃᑯᑎᒍᑦ, ᐊᐅᓚᔪᒃᑯᓪᓗ ᑕᕐᕆᔭᐅᑎᑎᒍᑦ, ᖃᕆᑕᐅᔭᒃᑯᓪᓗ, ᑕᕐᕆᔭᐅᑎᑎᒍᓪᓗ, ᓴᓇᐅᒐᓕᐅᖅᑎᑎᒍᓪᓗ ᑕᑯᒃᓴᐅᑎᑕᐅᓲᓂᒃ, ᐊᒻᒪᓗ ᐊᓯᖏᑦᑎᒍᑦ. ᖁᕕᐊᓱᖕᓂᐊᖅᐳᓯ ᑕᐅᑐᒃᑎᓪᓗᓯ ᓴᓇᔭᐅᓯᒪᔪᓂᒃ, ᑕᐅᖅᓰᔾᔪᑕᐅᓯᒪᔪᓂᒃ, ᐊᒻᒪᓗ ᐅᖃᓪᓚᖃᑎᒌᒍᑕᐅᓯᒪᔪᓂᒃ ᑖᒃᑯᓇᖓᑦ ᓯᓚᕐᔪᐊᑉ ᑲᓇᖕᓇᖓᓂᕐᒥᐅᑕᐃᑦ ᓴᓇᐅᒐᖏᓐᓂᒃ ᐊᒻᒪᓗ ᐃᓕᖅᑯᓯᑐᖃᖏᓐᓂᒃ ᐱᓕᕆᐊᖑᔪᓂᒃ.
ᐃᓚᐅᖃᑕᐅᓗᓯ ᑕᕝᕙᓂ 2022−ᒥᑦ ᐅᑭᐅᖅᑕᖅᑐᒥ ᓴᓇᐅᒐᓕᕆᓂᕐᒧᑦ ᑲᑎᒪᓂᕐᔪᐊᖑᔪᒥᑦ, ᐃᓚᐅᖃᑕᐅᓗᓯ ᐅᑭᐅᖅᑕᖅᑐᒥᑦ ᓴᓇᐅᒐᓕᕆᓂᐅᔪᓂᒃ ᐊᒻᒪᓗ ᐃᓕᖅᑯᓯᑐᖃᕆᔭᐅᔪᓂᒃ, ᐊᒻᒪᓗ ᖃᐅᔨᓗᓯ ᐊᒥᓱᓂᒃ ᖃᐃᖁᔭᐅᓯᒪᔪᑦ ᓴᓇᐅᒐᓕᐅᖅᑕᖏᓐᓂᒃ ᑕᑯᓗᓯ. ᓄᑕᓂᒡᓗ ᑕᑯᔭᒃᓴᐅᔪᓂᒃ ᑕᑯᒃᓴᐅᑎᑦᑎᖃᑦᑕᕐᓂᐊᖅᐳᒍ ᐱᓇᓱᐊᕈᓯᒪᑖᓂᒃ.
ᐱᔾᔪᑎᓕᒃ ᐃᓚᐅᓗᓯ ᑲᑎᒪᕐᔪᐊᓂᐅᔪᒥᑦ
ᐃᓚᐅᓂᕐᒥᒃ ᑲᑎᒪᕐᔪᐊᓂᐅᔪᒥᒃ ᑲᑎᒪᓂᐅᓂᐊᖅᑐᖅ ᓄᓇᖁᑎᒋᔭᐅᒻᒪᕆᒃᑐᓂᒃ ᑖᒃᑯᓇᖓᑦ Kwanlin Dun ᐃᖅᑭᓕᖕᓂᑦ ᐊᒻᒪᓗ Kwach’an ᑲᑎᒪᔨᖏᓐᓂᑦ ᕗᐊᐃᒃᕼᐅᕐᔅᒥᑦ, ᔫᑳᓐᒥᑦ ᔫᓂ 27-ᒥᑦ 29−ᒧᑦ, 2022. ᑖᓐᓇ ᑲᑎᒪᓂᕐᔪᐊᖑᓂᐊᖅᑐᖅ ᐱᔾᔪᑎᖃᕐᓂᐊᖅᑐᖅ ᐱᒻᒪᕆᐅᔪᓂᒃ, ᐅᖃᓪᓚᖃᑎᒌᒍᑕᐅᓂᐊᖅᑐᓂᒡᓗ, ᖃᕆᓴᐅᔭᑎᒍᓪᓗ ᐱᓕᕆᔾᔪᑕᐅᖃᑦᑕᕐᓂᐊᖅᑐᓂᒃ, ᑲᑎᒪᓗᑎᒡᓗ ᑕᑯᒃᓴᐅᑎᑕᐅᖃᑦᑕᕐᓂᐊᖅᑐᓂᒃ ᐊᒻᒪᓗ ᖁᖏᐊᖅᑎᑦᑎᕙᒡᓗᑎᒃ.
ᐃᓚᐅᓂᐊᖅᑐᑦ ᓄᓇᓕᖕᓂᒑᖅᑐᓂᒃ, ᐊᒻᒪᓗ ᓄᓇᖃᖅᑳᖅᓯᒪᔪᓂᒑᖅᑐᑦ ᑎᓕᓯᓂᐊᖅᐳᑦ ᑲᑎᒪᕐᔪᐊᕐᓂᐅᔪᒧᑦ ᑲᑎᒪᖃᑕᐅᓂᐊᖅᑐᓂᒃ, ᐊᑐᓂᓗ ᐱᓕᕆᐊᕆᓂᐊᖅᑕᒥᓂᒃ ᓇᖕᒥᓂᖅ ᑕᑯᒃᓴᐅᑎᑦᑎᓗᑎᒃ ᑕᕝᕙᓂ ᑲᑎᒪᓂᕐᔪᐊᖑᓂᐊᖅᑐᒥᒃ. ᖁᖏᐊᖅᑎᑦᑎᔩᓪᓗ ᐊᒻᒪᓗ ᑕᑯᒃᓴᐅᑎᑦᑎᓂᐊᖅᑐᑦ ᐱᑎᑕᐅᖃᑦᑕᕐᓂᐊᕐᒥᔪᑦ ᑕᑯᔭᐅᔪᓐᓇᕐᓗᑎᒡᓗ ᐃᓄᓕᒫᓄᑦ.
ᐱᔾᔪᑎᓕᒃ ᐅᑭᐅᖅᑕᖅᑐᒥᑦ ᓴᓇᐅᒐᓕᕆᓂᕐᒧᑦ ᑲᑎᒪᓂᕐᔪᖓᖑᓂᐊᖅᑑᑉ 2022 ᑕᖅᓴᖓᓂᒃ ᓇᓗᓇᐃᒃᑯᑕᖓᓂᒃ
ᑖᓐᓇ ᑕᖅᓴᖅ ᓇᓗᓇᐃᒃᑯᑕᖅ ᐅᑭᐅᖅᑕᖅᑐᒥᑦ ᓴᓇᐅᒐᓕᐅᖅᑎᓄᑦ ᑲᑎᒪᓂᕐᔪᐊᖅ 2022−ᒥᑦ ᑐᑭᖃᖅᐳᖅ, ᐱᓕᕆᓂᑦᑎᓐᓂᒃ ᑕᒪᐅᖓᖅᑎᑕᐅᓂᑦᑎᓐᓂᒃ ᑕᑯᒃᓴᐅᑎᑕᕗᑦ, ᑖᒃᑯᓇᖓᑦ ᓴᓇᔭᐅᓚᐅᖅᑐᖅ Carcross/Tagish ᐃᖅᑭᓕᖕᓂᒃ ᐊᒻᒪᓗ ᓴᓇᐅᒐᓕᐅᖅᑎᒧᑦ ᑉᓕᒃ Shaa’koon Lepine-ᒧᑦ.
ᐱᓕᕆᖃᑎᒌᑦ
ᐊᒥᓱᑦ ᑲᑐᔾᔨᖃᑎᒌᖑᔪᑦ ᐊᒻᒪᓗ ᐃᓄᑐᐃᓐᓇᐃᑦ ᐱᓕᕆᖃᑎᒌᒃᓯᒪᕗᑦ 2022−ᒥᑦ ᐅᑭᐅᖅᑕᖅᑐᒥᑦ ᓴᓇᐅᒐᓕᕆᓂᕐᒧᑦ ᑲᑎᒪᓂᕐᔪᐊᕐᒥᑦ ᑲᔪᓯᓂᖃᑦᑎᐊᖅᑎᑦᑎᒻᒪᕆᒃᖢᑎᒃ. ᖁᔭᓕᒻᒪᕆᒃᐳᒍᑦ ᑖᒃᑯᓄᖓᓕᒫᖅ ᐱᓕᕆᖃᑎᒌᒃᑐᓄᑦ ᐃᑲᔪᕐᓂᖃᑦᑎᐊᓚᐅᕐᒪᑕ ᑖᔅᓱᒧᖓ ᐱᒻᒪᕆᐊᓘᔪᒧᑦ ᐱᓕᕆᐊᖑᔪᒧᑦ.
