ᐃᓅᖃᑎᓇᕆᔭᒃᑲ ᐃᓘᓐᓇᑎᒃ,
ᑭᒡᒐᖅᑐᓪᓗᒋᑦ ᑲᓇᑕᒥ ᑲᑎᒪᔨᑦ ᓴᓇᙳᐊᓂᒻᒧᑦ ᐊᒻᒪᓗ ᒐᕙᒪᖏᑦ ᔫᑲᓐᒥ ᐃᐱᓇᑐᒪᕆᐊᓗᒻᒥᒃ ᓇᑯᒻᒦᕈᒪᒐᑦᑕ ᐃᓕᔅᓯᓐᓂᒃ ᐊᒥᓲᓪᓗᓯ ᐊᓐᓂᓇᖅᑐᒪᕆᐋᓗᓪᓗᓯ ᑲᑎᒪᒋᐋᖅᑎᑕᐅᓯᒪᔪᓯ, ᓴᓇᙳᐊᖅᑎᐅᓪᓗᓯ, ᖃᐅᔨᒪᓂᒻᒥᒃ ᐱᓯᒪᒃᓯᔨᐅᔪᓯ, ᐃᓕᖅᑯᓯᖃᓂᒻᒥᒃ ᑲᔪᓯᑎᑦᑎᔨᐅᓂᔅᓯᓐᓄᑦ, ᐱᓕᕆᖃᑎᒋᔭᕗᓪᓗ ᐊᒻᒪᓗ ᐃᑲᔪᖃᑕᐅᒍᒪᓯᒪᓂᔅᓯᓐᓄᑦ ᐱᓕᕆᖃᑕᐅᓂᕆᔭᔅᓯᓐᓂ 2022−ᒥ ᐅᑭᐅᖅᑕᖅᑐᒻᒥ ᓴᓇᙳᐊᓂᒻᒧᑦ ᑲᑎᒪᒋᐊᖅᑎᑕᐅᓯᒪᔪᓂᔅᓯᓐᓄᑦ. ᓇᑯᕆᑦᑎᐊᕋᒃᑎᒍ ᐃᓘᓐᓇᑎᒃ ᑕᐃᒃᑯᐊ ᑲᑎᒪᒋᐊᖃᑕᐅᓚᐅᖅᑐᑦ ᐊᒻᒪᓗ ᐃᑲᔪᓚᐅᖅᑐᑦ, ᑕᐃᑲᓂᐅᒐᓗᐊᖅᑲᑕᓘᓐᓂᑦ ᐅᐊᐃᑦᕼᐅᐊᓯᒥ, ᐅᖃᐅᓯᖃᒃᑐᓂᒃ ᐃᓕᖅᑯᓯᒃᑯᑦ ᓄᓇᓕᖃᕐᕕᐅᔪᓂᒃ ᑭᐅᐃᓐᓕᓐ ᑎᓂ ᐊᓪᓚᓂᑦ ᐊᒻᒪᓗ ᑕᐊᓂ ᑭᐅᐃᑦᓴᓐ ᑲᑎᒪᔨᖏᓐᓂᒃ, ᐅᕝᕙᓗᓂᑦ ᖃᕋᑕᐅᔭᒃᑰᓪᓗᑎᒃ ᑲᑎᒪᓂᐅᔪᒧᑦ ᖃᕋᑕᐅᔭᒃᑯᑦ.
ᐊᑐᓂ ᑲᑎᒪᓂᑦ ᐱᐅᔪᐋᓗᒻᒪᑕ ᐱᓕᕆᒋᐊᕕᓴᐅᓗᑎᒃ ᖁᕕᐊᓱᖃᑎᒌᒍᑎᒋᓗᒋᑦ ᐊᒻᒪᓗ ᐃᑲᔪᖃᑎᒌᕝᕕᐅᓗᑎᒃ ᐅᑭᐅᖅᑕᖅᑐᒻᒥ ᓴᓇᙳᐊᖅᑎᐅᖃᑎᒌᒃᑐᓂᑦ ᐊᒻᒪᓗ ᓄᓇᓕᕐᔪᐊᖑᖃᑎᒋᓂᑦ, ᐊᒻᒪᓗ ᐅᐱᓇᑦᑎᐊᓚᐅᖅᑐᓂ ᑕᒪᓐᓇ ᑲᑎᒪᓂᖅ ᐱᓗᐊᙳᐊᖅᑐᒥᒃ ᐱᓕᕆᐊᕆᒐᓂᖅᓯᑎᑦᑎᒍᑕᐅᓂᖓᓄᑦ ᐊᒻᒪᓗ ᑲᑎᖃᑎᒌᒍᑕᐅᓂᖓᓄᑦ ᒪᑭᑕᑦᑎᐊᕈᓐᓇᑐᒪᕆᐊᓘᔪᓄᑦ ᑭᒡᒐᖅᑐᐃᓂᒻᒥᒍᑦ ᓄᓇᖃᖅᑳᒃᓯᒪᔪᑦ ᓂᐱᖃᓂᖏᓐᓂᒃ, ᑐᑭᓯᓇᑦᑎᐊᓂᖏᓐᓂᒃ, ᐊᒻᒪᓗ ᓯᕗᓕᖅᑎᐅᓂᖏᓐᓂᒃ ᐃᓘᓐᓇᓕᒫᖏᓐᓂ ᖃᓄᐃᓕᒐᓂᕆᔭᖏᓐᓂ ᖃᓄᐃᓘᖅᑎᑦᑎᒍᑕᐅᔪᒥ.
ᖁᕕᐊᒋᔭᔅᓴᕆᓚᐅᕋᓗᐋᖅᑲᓯ 2022 ᑲᑎᒪᓂᖅ ᐊᒻᒪᓗ ᐊᑑᑎᖃᓕᖅᑎᑕᐅᓂᖅᓴᐅᓪᓗᑎᒃ ᐅᖃᓚᐅᑎᒋᔭᐅᖏᑦᑐᒃᑰᑲᐃᓇᖃᑦᑕᓃᑦ ᐊᒻᒪᓗ ᓴᓇᙳᐊᖅᑎᐅᓂᕐᒧᑦ ᐱᓕᕆᒍᑎᓴᖁᑏᑦ. ᑕᐃᒪᓕ ᑲᔪᓯᑎᓪᓗᓯ ᐋᖅᑭᓱᐃᕙᓪᓕᐊᓂᔅᓯᓐᓂᒃ ᖃᐅᔨᒪᓂᒻᒥ ᐊᒻᒪᓗ ᑲᑎᖃᑎᒌᓂᐅᔪᓂ ᐊᑐᖅᑕᐅᔪᓂ ᖃᓄᐃᓘᕈᑕᐅᑎᓪᓗᒋᑦ ᖃᓄᐃᓘᖅᑎᑦᑎᒍᑎᐅᔪᑦ, ᑲᔪᖏᓴᐃᕗᒍᑦ ᐃᓕᔅᓯᓂᒃ ᑕᑯᒋᐊᒃᑲᓂᖁᓪᓗᓯ ᑕᑯᓴᐅᑦᑕᐅᑎᒋᑎᓪᓗᒋᑦ ᖃᐅᔨᓇᓱᐊᖅᑎᑕᐅᔪᑦ ᓂᐱᓕᐅᖅᑕᐅᓚᐅᕐᓂᖏᓐᓂ ᐊᒻᒪᓗ ᖃᐅᔨᓇᓱᐊᓗᒋᑦ ᐊᖏᔪᐋᓗᐃᑦ ᑎᑦᑕᕋᓛᑎᒍ ᐱᓕᕆᔾᔪᑎᒃᓴᐃᑦ ᐱᔭᐅᒍᓇᖅᑎᑕᐅᔪᑦ ᐃᑭᐊᕿᕕᒃᑯᑦ ArcticArtsSummit.com, ᑖᔅᓱᒨᓇᓗ ᓄᑖᑦ ᐃᓗᓕᕆᓂᐊᖅᑕᖏᑦ ᑲᔪᓯᑎᑕᐅᓂᐊᕐᒪᑕ ᐃᓚᓕᐅᑎᔭᐅᖏᓐᓇᖃᑦᑕᓪᓗᑎᒃ.
ᓱᓕᒃᑲᓐᓂᖅ, ᐱᒐᓴᐅᑎᑦᑎᒐᑦᑕ ᓱᓕᓪᓚᕆᓗᑕ ᓇᑯᓴᑦᑎᐊᓂᑦᑎᓐᓂᒃ ᐱᕚᓪᓕᕈᑎᖃᑦᑎᐊᓇᓐᓂᖏᓐᓂᒃ ᐅᖃᖃᑎᒌᒍᑎᒋᖃᑦᑕᓚᐅᖅᑕᑦᑎᓐᓂᒃ, ᐊᑑᑎᖃᓂᓴᐅᓕᖅᑎᓪᓗᑎᒍ ᐱᓕᕆᖃᑎᒌᓂᕆᓲᕗᑦ, ᐊᒻᒪᓗ ᑐᑭᓯᑦᑎᐊᓇᖅᑐᓂᒃ ᑐᓂᓯᖃᑦᑕᐅᑎᖃᓚᐅᓂᑦᑎᓂᒃ ᐊᑐᓚᐅᖅᑐᓂ ᐊᕐᕌᒍᓚᐅᖅᑐᓂ. ᓂᕆᐅᑦᑎᐊᖅᑯᒍᑦ ᐋᖅᑭᓱᐃᓂᐊᓂᑦᑎᓐᓂᒃ ᐱᓕᕆᖃᑎᒌᑦᑎᐊᓕᓂᕆᔭᑦᑎᓂᒃ ᐋᖅᑭᓱᓚᐅᖅᑕᑦᑎᓐᓂᒃ ᐊᑐᖅᑎᓪᓗᒍ 2022 ᐅᑭᐅᖅᑕᖅᑐᒻᒥ ᓴᓇᙳᐊᓂᒻᒧᑦ ᑲᑎᒪᖃᑎᒋᓂᒻᒥᒃ ᐃᖃᓇᐃᔭᖅᑎᓗᑕ – ᑲᑐᔾᔨᓗᑕ – ᑕᐅᕗᖓᒃᑲᓐᓂᖅ ᓴᙱᔪᕈᑎᒋᐊᒃᑲᓂᓪᓗᒋᑦ ᐊᒻᒪᓗ ᑲᓱᖅᓯᒪᓕᖅᑎᓪᓗᑎᒍ ᓴᓇᙳᐊᓃᑦ ᐊᒻᒪᓗ ᐃᓕᖅᑯᓯᖃᓃᑦ ᐃᓘᓐᓇᓕᒫᖓᓂ ᐅᑭᐅᖅᑕᖅᑑᑉ.
